સુરત ડિસ્ટ્રિક્ટ બેંકમાં ‘પિસ્તોલ’ની અણીએ ફિલ્મી ઢબે લૂંટ / 4 મિનિટમાં ‘પિસ્તોલ’ની અણીએ 6.83 લાખની લૂંટ, માત્ર 1 લૂંટારા દ્વારા 4 મિનિટમાં લૂંટનો ખેલ

સુરતના કડોદરા ચાર રસ્તા પાસે પોલીસચોકીની સામે આવેલી સુરત ડિસ્ટ્રિકટ કો-ઓપ.બેંકની શાખામાં ગત રોજ ધોળા દિવસે લૂંટ થઈ હતી. 4 વાગ્યાના સમયે એક લૂંટારો મોઢા પર માસ્ક પહેરીને બેંકમાં ઘૂસી ડુપ્લિકેટ પિસ્તોલ જેવા હથિયારથી 4 કર્મચારીને બાનમાં લઇ રૂમમાં પૂરી ઘૂંટણિયે બેસાડીને માત્ર 4 મિનિટમાં કેશમાંથી 6,83,967 લાખ રૂપિયાની લૂંટ કરી ભાગી ગયો હતો.

મેઇન રસ્તા પર લૂંટની ઘટનાને પગપાળા આવેલા લૂંટારો ઘટનાને અંજામ આપી ગયો હતો. લૂંટની ઘટનાને પગલે સુરત જિલ્લા પોલીસ દોડતી થઈ હતી. મોતા ગામે અગાઉ ઓક્ટોબરમાં સુરત ડિસ્ટ્રિક્ટ બેંકની શાખમાં લૂંટની ઘટનાને અંજામ આપ્યો હતો, જેનો હજુ ભેદ ઉકેલાયો નથી. ત્યાં ફરી કડોદરામાં ડિસ્ટ્રિક્ટ બેંકમાં લૂંટ થઈ છે. હાલ તો પોલીસ સીસીટીવી આધારે તપાસ કરી રહી છે.

ગ્રાહકના સ્વાંગમાં એક લૂંટારો બેંકમાં ઘૂસ્યો હતો. કડોદરા ચાર રસ્તા નજીક વામદોત પેટ્રોલ પંપની બાજુમાં આવેલા એક કોમ્પ્લેક્સમાં પહેલા માળે સુરત ડિસ્ટ્રિકટ કો-ઓપ.બેંકની કડોદરા શાખા આવેલી છે. સોમવારે સાંજે 4 વાગ્યાના અરસામાં બેંકમાં ગ્રાહકના સ્વાંગમાં એક લૂંટારો યુવક માથા પર ટોપી અને મોઢા પર માસ્ક પહેરીને ઘૂસી ગયો હતો. પહેલા બેંકના એટીએમ મશીન તરફ જઈ બેંકની અંદરની પરિસ્થિતિનો તાગ મેળવ્યા બાદ સીધો બેંકમાં ઘૂસી ગયો હતો. આ સમયે બેંકમાં મેનેજર ધવલ પટેલ અન્ય એક પુરુષ કર્મચારી અને 2 મહિલા કર્મચારી મળી કુલ 4 કર્મચારી હાજર હતાં.

બેંકના મુખ્ય દરવાજાને તાળું મારી ભાગી ગયો. અચાનક લૂંટારાએ તેની પાસેની થેલીમાંથી પિસ્તોલ જેવું હથિયાર બતાવી ચલો પૈસા નિકાલો, પૈસા નિકાલો કહી તમામ કર્મચારીઓના ફોન ફેંકાવી, ઘૂંટણિયે બેસાડયા હતા. તમામને બંધક બનાવી બાદમાં બેંકમાંથી કેશ બારી પાસે જઈ એક બેગમાં 6,83,967 લાખ રૂપિયા ભરીને લૂંટ ચલાવી, બેંકના મુખ્ય દરવાજાને તાળું મારી ભાગી છૂટ્યો હતો. ધોળા દિવસે ભરચક વિસ્તાર અને મુખ્યમાર્ગ પર લૂંટ થવાની ઘટનાને લઈ એલ.સી.બી., એસ.ઓ.જી. તેમજ સ્થાનિક પોલીસનો કાફલો ઘટનાસ્થળે પહોંચી ગયો હતો.

લૂંટારો પ્રોફેશનલ નહીં હોવાનું અનુમાન, ઘટના અંગે કડોદરા બ્રાન્ચ મેનેજર ધવલ પટેલે કડોદરા GIDC પોલીસમાં ફરિયાદ નોંધાવી છે. આ અંગે કડોદરા પોલીસ સ્ટેશનના થાણે ઇન્ચાર્જ બીશાખા જૈને જણાવ્યું હતું કે CCTV ફૂટેજના જિલ્લા તેમજ ગાંધીનગર કન્ટ્રોલ રૂમ સુધી સર્ક્યુલેટ કર્યા છે તેમજ કડોદરા પોલીસની ટીમ સાથે SOG અને LCB પણ આ અંગે ઝીણવટપૂર્વકની તપાસ કરી રહી છે. CCTV જોતાં લૂંટારો પ્રોફેશનલ નહીં હોવાનું લાગી રહ્યું છે.

એલર્ટ સાયરન વગાડ્યું, પણ કોઈ મદદે ન આવ્યું. કર્મચારીએ લૂંટારાના નીકળતાંની સાથે જ એલર્ટ સાયરનનું બટન દબાવ્યું હતું. આમ છતાં આજુબાજુથી કોઈ વ્યક્તિ મદદ માટે પહોંચી ન હતી. આખરે બેંકકર્મચારીઓએ જાતે તાળું તોડીને બહાર નીકળ્યા હતા.